මහනුවර, නුවරඑළිය, සහ බදුල්ල දිස්ත්‍රික්කවල පහළ ප්‍රදේශවල මැන්ඩරින් නැමැති දොඩම් විශේෂය වගාව සඳහා මුල්‍ය ආධාර ලබාදීමට කෘෂිකර්ම අමාත්‍යාංශය තීරණය කර ඇත.
2023 අයවැයෙන් වෙන් කර ඇති මුදල් නව වගා ව්‍යාපෘති සඳහා යෙදවීම සම්බන්ධයෙන් කෘෂිකර්ම අමාත්‍යාංශයේ පැවැති සාකච්ඡාවකදී මෙම තීරණය ගෙන ඇත. මැන්ඩරින් දොඩම් සහ දේශීය දොඩම් සඳහා ඇති විශාල ඉල්ලුම මෙන්ම විදේශ රටවලින් වාර්ෂිකව පලතුරු ආනයනය කිරීම හේතුවෙන් විශාල මුදලක් වැය වන බව කෘෂිකර්ම අමාත්‍ය මහින්ද අමරවීර මහතා පෙන්වා දුන්නේය.
2022 දී දොඩම් මෙට්‍රික් ටොන් 2,407 කට ආසන්න ප්‍රමාණයක් ආනයනය කර ඇත්තේ රු. මිලියන 496 කටය. 2019 වසරේ මෙට්‍රික් ටොන් 7,773 කට ආසන්න ප්‍රමාණයක් ආනයනයට වැයකර ඇත්තේ රු. මිලියන 949 කි. මේ ආකාරයට 2020 සහ 2021 දී පිළිවෙලින් රු. මිලියන 670 ක් සහ රු. මිලියන 735 ක් වියදම් කර ඇතිබව අමාත්‍යවරයා ප්‍රකාශ කලේය. ආනයනික දොඩම් අතරින් වැඩිපුරම දක්නට ලැබෙන්නේ මැන්ඩරින් දොඩම් බවත් එය ශ්‍රී ලංකාවේ වගා කළ හැකි බවත් අමාත්‍ය මහින්ද අමරවීර මහතා පැවසීය. ශ්‍රී ලංකාවේ මැන්ඩරින් දොඩම් වගාව සම්බන්ධයෙන් සිදුකළ පර්යේෂණ සාර්ථක වී ඇති බව සඳහන් කළ ඒ මහතා බදුල්ල, නුවරඑළිය සහ මහනුවර දිස්ත්‍රික්කවල පහළ ප්‍රදේශ මැන්ඩරින් දොඩම් වගාව සඳහා සුදුසු දේශගුණයක් සහිත ප්‍රදේශ ලෙස හඳුනාගෙන ඇති බවද සඳහන් කළේය. මැන්ඩරින් දොඩම් වගාවට අදාළ ව්‍යාපෘති වාර්තාවක් ඉදිරිපත් කර ඇති අතර මහනුවර, නුවරඑළිය සහ බදුල්ල දිස්ත්‍රික්කවල වගා කලාප මෙම වසර තුළ ස්ථාපිත කිරීමට පියවර ගන්නා ලෙස අමාත්‍යවරයා එම දෙපාර්තමේන්තුවේ නිලධාරීන්ට උපදෙස් ලබාදී තිබේ.
මේ වනවිට කෘෂිකර්ම දෙපාර්තමේන්තුවට අයත් පැළ තවාන්වල මැන්ඩරින් දොඩම් පැළ අවශ්‍ය තරම් රෝපණය කර තිබෙන නිසා ඒවා වගාව සඳහා යොදා ගැනීමට තීරණය කරනු ලැබීය. මෙම සාකච්ඡාවට අමාත්‍යාංශයේ ලේකම් ගුනදාස සමරසිංහ, කෘෂිකර්ම දෙපාර්තමේන්තුවේ අධ්‍යක්ෂ ජනරාල් මාලතී පරසුරාමන් මහත්මිය ඇතුළු පිරිසක් සහභාගි වූහ.
