නව ඇමෙරිකානු තීරුබදු ක්‍රමය සම්බන්ධයෙන් අවශ්‍ය පියවර සොයා බැලීමට සහ රජයට නිර්දේශ ඉදිරිපත් කිරීමට පත් කරන ලද කමිටුව අප්‍රේල් 3 සවස ජනාධිපති අනුර කුමාර
නව ඇමෙරිකානු තීරුබදු ක්‍රමය සම්බන්ධයෙන් අවශ්‍ය පියවර සොයා බැලීමට සහ රජයට නිර්දේශ ඉදිරිපත් කිරීමට පත් කරන ලද කමිටුව අප්‍රේල් 3 සවස ජනාධිපති අනුර කුමාර දිසානායක මහතා සමඟ ජනාධිපති ලේකම් කාර්යාලයේදී හමුවිය.
සාකච්ඡාව අතරතුර, මෙම තීරුබදු පසුබිම හා පදනම, මෙන්ම ශ්‍රී ලංකාව වැනි කුඩා ආර්ථිකයන්ට ඉහළ වටිනාකමකින් යුත් තීරුබදු පැනවීම නිසා මුහුණ දීමට සිදුවිය හැකි ආර්ථික අභියෝග පිළිබඳව ගැඹුරු සමාලෝචනයක් සිදු කරන ලදී.
මතුවන තත්ත්වයට ප්‍රතිචාර වශයෙන් ශ්‍රී ලංකාව ගත යුතු ක්‍රියාමාර්ග සහ ඉදිරියට ක්‍රියාත්මක කළ යුතු අවශ්‍ය පියවර පිළිබඳවද පුළුල් සාකච්ඡාවක් පැවැත්විණි.
කමිටුව නියෝජනය කරමින්, ජනාධිපතිවරයාගේ ජ්‍යෙෂ්ඨ ආර්ථික උපදේශක දුමින්ද හුලුගමුව මහතා, මුදල් අමාත්‍යාංශයේ ලේකම් මහින්ද සිරිවර්ධන මහතා, මහ බැංකු අධිපති ආචාර්ය නන්දලාල් වීරසිංහ මහතා, වෙළඳ අමාත්‍යාංශයේ ලේකම් ඒ. විමලනැත්තිරාජ මහතා, අපනයන සංවර්ධන මණ්ඩලයේ සභාපති මංගල විජේසිංහ මහතා, විදේශ කටයුතු අමාත්‍යාංශයේ ජ්‍යෙෂ්ඨ අධ්‍යක්ෂ ජනරාල් (ද්විපාර්ශ්විය) දර්ශන පෙරේරා මහතා, සිලෝන් වෙළඳ මණ්ඩලයේ ප්‍රධාන ආර්ථික ප්‍රතිපත්ති උපදේශක ෂිරාන් ප්‍රනාන්දු මහතා, බ්‍රැන්ඩික්ස් සමූහයේ ප්‍රධාන විධායක නිලධාරී අෂ්රොෆ් ඔමාර් මහතා, මාස් හෝල්ඩිංග්ස් හි සම-නිර්මාතෘ ෂරාඩ් අමලීන් මහතා, ලංකා ගාමන්ට්ස් හි කළමනාකාර අධ්‍යක්ෂ සයිෆ් ජැෆර්ජී මහතා සහ මිෂෙලින් ලංකා (පුද්) සමාගම නියෝජනය කරමින් නිලන්ති වෙලිවේ මහත්මිය රැස්වීමට සහභාගි වූහ.
එමෙන්ම, කම්කරු අමාත්‍ය සහ ආර්ථික සංවර්ධන නියෝජ්‍ය අමාත්‍ය ආචාර්ය අනිල් ජයන්ත ප්‍රනාන්දු මහතා සහ මුදල් හා සැලසුම් නියෝජ්‍ය අමාත්‍ය ආචාර්ය හර්ෂණ සූරියප්පෙරුම මහතා ද සාකච්ඡාවට සහභාගි වූහ. (ජනාධිපති මාධ්‍ය අංශය)
