පොලිස් අපරාධ කොට්ඨාශයේ උසස් නිලධාරීන් සඳහන් කළේ පාසල් සිසුන් සඳහා විද්‍යුත් තැපෑල ගිණුම් සැකසීමේදී දෙමාපියන්ගේ දත්ත ඇතුළත් නොකර දරුවන්ගේ නිවැරදි වයස ඇතුළත් කරන ලෙසයි.
සංහිඳියාව සහ ජාතික සමගිය පිළිබඳ ආංශික අධීක්ෂණ කාරක සභාවේදී එම නිලධාරීන් මේ බව සඳහන් කළේය. පසුගිය වකවානුවේ අන්තර්ජාලය හරහා අධ්‍යාපනය ප්‍රචලිත වීම හේතුවෙන් දරුවන්ට පරිගණක උපාංග වෙත ප්‍රවේශ වීම සඳහා ජංගම දුරකථන (Smart Phone Active) ලබාදීම අවශ්‍ය වූ බව එම නිලධාරීහු පෙන්වා දුන්හ. කෙසේ වෙතත් ස්මාර්ට් දුරකථන ලබාදීමේදී සහ විද්‍යුත් තැපෑල සෑදීමේදී මේ සඳහා දෙමාපියන්ගේ දත්ත ලබාදීමෙන් දරුවන්ට ඕනෑම වෙබ් අඩවියකට පිවිසීමේ අවස්ථාව උදාවන බව ඔවුන් පෙන්වා දුන්නා. එසේ නොමැතිව දරුවන්ගේ නිවැරදි වයස ඇතුළු තොරතුරු ලබා දෙන්නේ නම් දරුවන්ට නුසුදුසු වීඩියෝ සහ වෙබ් අඩවි නැරඹීමේ හැකියාව සහ ප්‍රවේශය අන්තර්ජාල පද්ධතිය විසින්ම පාලනය කරනු ඇත.
පාර්ලිමේන්තු මන්ත්‍රී ඩිලාන් පෙරේරා මහතාගේ ප්‍රධානත්වයෙන් ජාතික සංහිඳියා හා ළමා හා කාන්තා කාර්යාංශය සමඟ එක්ව ක්‍රියාත්මක කිරීමට නියමිත වැඩපිළිවෙළ පිළිබඳව සාකච්ඡා කිරීම සඳහා සංහිඳියාව සහ ජාතික සමගිය පිළිබඳ ආංශික අධීක්ෂණ කාරක සභාව රැස්වූ අවස්ථාවේදී මේ පිළිබඳව සාකච්ඡා කෙරිණි. තවද දුරකථනය භාවිතා කරන අතරතුර, දුරකථනය විදුලි සංදේශ නියාමන කොමිෂන් සභාව (TRC) විසින් අනුමත කර ඇත්දැයි පරීක්ෂා කිරීම වැදගත් වේ. එනම් යම්කිසි අපරාධ ක්‍රියාවක් සඳහා එම දුරකථන භාවිත කරන්නේ නම් ඒ සඳහා ඉක්මනින් කටයුතු කිරීමේ හැකියාව මෙම දුරකතන වලට ඇති බැවිනි. මෙයින් අදහස් කරන්නේ විදුලි සංදේශ නියාමන කොමිෂන් සභාවේ (TRC) ලියාපදිංචි ජංගම දුරකථනයකට සිම් කාඩ්පතක් ඇතුළත් කළ විට අදාළ තොරතුරු කොමිසමට ලැබෙන බවයි. එබැවින් ජංගම දුරකථන මිලදී ගැනීමේදී විදුලි සංදේශ නියාමන කොමිෂන් සභාවේ (TRC) ලියාපදිංචිය සහිත ජංගම දුරකථන මිලදී ගන්නා ලෙස පොලිස් නිලධාරීන්ට දැනුම් දෙන ලදී. තවද ජාතික සංහිඳියාව සහ ළමා හා කාන්තා කටයුතු සම්බන්ධයෙන් පොලිසිය ගෙන යන වැඩපිළිවෙළ පිළිබඳව ද මෙහිදී පුළුල් ලෙස කතාබහට ලක්විය.
