ඉන්ධන බෙදාහැරීම කඩාකප්පල් කරන්නන්ට විරුද්ධව දැඩි පියවර

නිවේදනයක් නිකුත් කරමින් ලංකා ඛනිජ තෙල් නීතිගත සංස්ථාව (CPC) ප්‍රකාශ කළේ එවැනි වෘත්තීය සමිති නායකයින් සහ සේවකයින් CPC සහ Ceylon Petroleum Storage Terminals Limited (CPSTL) වෙත ඇතුළුවීම තහනම් කිරීමට ද තීරණය කර ඇති බවයි. අනෙකුත් සියලුම සේවකයින්ට පරිශ්‍රයට ඇතුළු වී ඉන්ධන බෙදා හැරීමේ ක්‍රියාවලිය අඛණ්ඩව සිදු කිරීමට අද දින අවසර ලබා දෙන බව ඛනිජ තෙල් නීතිගත සංස්ථාව වැඩිදුරටත් සඳහන් කළේය.

ඉන්ධන බෙදා හැරීමේ ක්‍රියාවලියට බලපෑම් කරමින් CPC පෞද්ගලීකරණයට එරෙහිව CPC වෘත්තීය සමිති නායකයින් සහ සාමාජිකයින් කිහිප දෙනෙකු සඳුදා වැඩවර්ජනයක් දියත් කිරීමෙන් පසුව මෙම පියවර ගෙන ඇත. ඉන්ධන බෙදා හැරීමේ කටයුතු සඳහා පොලීසිය සහ ත්‍රිවිධ හමුදාවද යොදවා ඇති අතර ඉන්ධන හිඟය සම්බන්ධයෙන් කලබල නොවන ලෙස විදුලිබල හා බලශක්ති අමාත්‍ය කාංචන විජේසේකර ඊයේ ජනතාවගෙන් ඉල්ලීමක් කළා. ප්‍රමාණවත් ඉන්ධන තොග ඇති බවට සහතික වෙමින් අද පෙරවරු 06.00 ට කොළොන්නාව සහ මුතුරාජවෙල පර්යන්තවලින් ඉන්ධන බෙදා හැරීම ආරම්භ කළ බව අමාත්‍ය විජේසේකර මහතා අද වැඩිදුරටත් ප්‍රකාශ කළේය.

එමෙන්ම ඇතැම් ඉන්ධන පිරවුම්හල් අප්‍රේල් මස මිල සංශෝධන අපේක්ෂාවෙන් ඉන්ධන ඇනවුම් කර නොමැති බවද ඔවුන්ට තම ඇනවුම් සිදුකර අවශ්‍ය අවම තොග පවත්වා ගැනීමට කටයුතු කරන ලෙසද අමාත්‍යවරයා ඉල්ලාසිටියේය.